كف(ن) من يلامس كف للشاعر (((إبراهيم بني عرابة)))

عجيبة قصة الضحكة وكف(ن) من يلامس كف
أنامل ذابت فــْ بعض الأنامل حيل ولهانة

حسبت ان الزمن مرة عطى قيمة لإشارة (( قــِف))
سكن في ضوّها الأحمر.. درى هالروح ضميانة

وقفت وداخلي بحر(ن) تجمد فـــِ العروق وجف
سألت النفس (لو كل(ن) عرف قدر الوفا وصانه!!)


وقالتلي الوفا ماهو تعابير(ن) تذوب بشف
ولا هو عالورق حبر(ن) زهي(ن) تلمع الوانه

تذكرت الِتي من شفتها وعنّي السفر ما كف
رسمها الشوق في عيني وسألها (وين يــ َ فـــْلانة ؟!!)

أحبك حيل لو تدرين واسْمك ف الخفوق انحفّ
تعالي وانْبشي عْروقه... مــَ غيرك عاشت انـْسانة

أخافه يقتله جرحه ويجيلك هالخبر ينزف
[[خفوق(ن) مات مسجون وْميدري عنْه سَجَّـانه]]

أخافه لا نده باسْمك صدى إسمك يعوف اللف
يصارح حيرته وْينطق (رحلتي عـنـْه خوّانة)

أنا من يوم ماشفتك وعن قلبي الظما ما خف
تعالي وْبللي عروقه.. تراها حيل عطشانة

حبيب(ن) ينطر عيونك وأشواقه قباله صف
كثر مشتاق لعيونك خفوقه ذاب فـــ احْظانه

كثر ما صار يكتبلك شعوره عالسطور وشف
قصايد خطها نزف الوريد ونزف شريانه

قصايد صغتها للي تصيّدها الحسن والْتف
عليها بزود زيّـنـها.. وهيْ من قبْل مزدانة

وبستان الخدود اللي إذا ضاقت وقالت( أُف)
أرى في أُفـّـها نهر(ن) تفجر وسط رُمّانه

أرى في حسنها بحر القوافي الـــْ ما حواها رف
ملت جوف السطور وأثقلت للحرف ميزانه

ضوى نورك بعيني يا غناتي وْلا تقولي طف
خذيني اليوم.. غطيني.. مـــــَ بين رْموش فـتـّـانة

وخبيني مع اشياءك.. تراني ما قدرتَ آْغف
هجرني النوم في بعدك.. شراعي ضاع قبطانه

وتهت ف بحر هالدنيا.. لأني ما تبعت الخف
أدور دوم عن مرفاك ..وينه صار عنوانه ؟؟

غرقت فْـــ رمل أحزاني وشوقي لك سناد ودف
كثر مشتاقلك جيتك تطفـّي الشوق واحْزانه

تعالي غيبتك تكفي روتني مْن الظما ويكفّ
حريق(ن) شبّ في صدري كثر هالروح ولهانة

جرت دمعة على خدّي.. ولمّا لامست هالكف
تذكرتك وهي تمسح دموع خدود مليانة